පාර්ලිමේන්තු මන්ත්‍රී, ප්‍රවීණ රංගන ශිල්පී උද්දික ප්‍රේමරත්න මහතා ඉලක්ක කර වෙඩි ප්‍රහාරයක් එල්ල කර තිබෙනවා.

පොලිසිය පැවසුවේ අනුරාධපුර, ගුවන් තොටුපොළ පාරේ පිහිටි ඔහුගේ නිවස ඉදිරිපිටදී ඊයේ (17) රාත්‍රී 10.30 පමණ ඔහුගේ මෝටර් රථයට වෙඩි තබා ඇති බවයි.

මන්ත්‍රීවරයා මෝටර් රථයෙන් බැස, ගේට්ටුවෙන් නිවසට ඇතුලුවන අවස්ථාවේදී වෙඩි ප්‍රහාරය එල්ල වී ඇති බවයි වාර්තා වන්නේ.

ඉන්, මන්ත්‍රීවරයාට කිසිදු හානියක් සිදුවී නොමැති බව සඳහන්.

පොලීසිය සඳහන් කළේ, වෙඩි තැබීම කර ඇත්තේ පිස්තෝල වර්ගයේ ගිනි අවියකින් බවයි.

එහිදී මෝටර් රථයේ පිටුපස අසුන ඉලක්ක කර වෙඩි ප්‍රහාර කිහිපයක් එල්ල වී ඇති අයුරු දක්නට ලැබෙන බව, අප වාර්තාකරු ප්‍රකාශ කළා.

සිද්ධිය සම්බන්ධයෙන් අනුරාධපුර පොලීසීය විසින් වැඩිදුර විමර්ශන ආරම්භ කර තිබෙනවා.
(lknews.lk)