ශුද්ධෝත්තම ෆ්‍රැන්සිස් පාප් වහන්සේගේ අභාවයෙන් පසුව හිස්වූ පාප් ධුරය සඳහා මීළඟ පාප් වහන්සේ තෝරාගැනීමේ නිල ක්‍රියාවලිය (Conclave) හෙට (07) සිදුකිරීමට වතිකානය මේ වනවිට සූදානම් කරමින් පවතිනවා.

ඒ අනුව පාප්වරණය පැවැත්වෙන වතිකානයේ සිස්ටීන් දෙව්මැදුරේ දුම් කවුළුව සවිකිරීම පසුගියදා සිදුකෙරුණි.

දුම් කවුළුව පාප්වරණයේ සුවිශේෂී භූමිකාවක් උසුලන අතර දිගුකාලීන සම්ප්‍රදාය ඔස්සේ යමින් පාප්වරණය මෙවරත් පැවැත්වෙන්නේ වතිකානයේ සිස්ටීන් දෙව්මැදුර තුළ බව විදෙස් මාධ්‍ය වාර්තා කළා.

ඊට රැස්වන කාදිනල්වරුන් අතර පැවැත්වෙන ඡන්ද විමසීමකින් නව පාප් වහන්සේ තෝරාගැනීමට නියමිතයි.

ඡන්දය අවසානයේදී ඔවුන්ගේ ඡන්දය සටහන් කරන කුඩා කඩදාසි කැබලි ගිනි තැබීමට කටයුතු කෙරෙන්නේ, නව පාප් වහන්සේ පත්කරගත්තාද? නැද්ද? යන්න සන්නිවේදනය කිරීම සඳහා යොදා ගැනීම සිදු කරනවා.

සිස්ටීන් දෙව්මැදුරේ දුම් කවුළුවට විශේෂ ස්ථානයක් හිමිවන්නේ මේ අවස්ථාවේදී වන අතර ඡන්ද පත්‍රිකා ගිනි තැබීමෙන් පසුව දුම් කවුළුව තුළින් ගලා එන දුමාරය කළු පැහැ නම් නව පාප් වහන්සේ පත්කරගැනීමට ප්‍රමාණවත් ඡන්ද එක් අපේක්ෂකයෙක් දිනාගෙන නොමැති බව ඉන් අදහස් කරයි.

යම් හෙයකින් දුම් කවුළුවෙන් නැගෙන දුමාරය සුදු පැහැ වනවා නම් ඉන් අදහස් වන්නේ නව පාප් වහන්සේ තෝරාගත් බව වන අතර මෙය සුබ පණිවුඩයක් බවට සලකන කතෝලිකයින් එම සුබ පණිවුඩය දැකගැනීමට වතිකානයට රැස්වන බවද වාර්තා වනවා.


(lknews.lk)